 |  |
- „შეგიძლია, მომკლა, მაგრამ ვერ გამანადგურებ. ბნელი მხარისადმი წინააღმდეგობას გამძლეობა სჭირდება. მხოლოდ სუსტები ნებდებიან.“
„იმაზე მეტად ძლიერია, ვიდრე წარმოგიდგენია.“
„და ვინც მას ეწინააღმდეგება, იმაზე მეტად ძლევამოსილია, ვიდრე წარმოგიდგენია.“ - ―ობი-ვან კენობი და მოლი
ობი-ვან კენობი, უფრო მოგვიანებით ცნობილი როგორც უბრალოდ ბენ კენობი, იყო ჯედაი, რომელიც გალაქტიკურ რესპუბლიკაში მსახურობდა. აგრეთვე ცნობილი იყო როგორც ანაკინ სკაიუოკერის და მისი ძის, ლუკ სკაიუოკერის მასწავლებელი.
დაბადებული პლანეტა სტიუჯონზე, კენობი კვაი-გონ ჯინის პადავანი გახდა. იგი იყო ახალი ათასწლეულის პირველი ჯედაი, რომელმაც დაამარცხა სითი — დართ მოლი. ბრძოლის დროს ჯინი სასიკვდილოდ დაიჭრა და განრისხებულმა კენობიმ დართ მოლი მოკლა, თუმცა, როგორც სერიალ კლონების ომებიდან ირკვევა, იგი მაინც გადარჩა. ჯინის სიკვდილწინა თხოვნით, კენობიმ ანაკინი აღზარდა როგორც პადავანი.
კლონების ომების პერიოდში სკაიუოკერს ჯედაი რაინდის წოდება მიენიჭა, ხოლო კენობი გახდა ჯედაების საბჭოს წევრი. გენერლების რანგში ამ ორს ერთად არა ერთხელ უბრძოლია. კლონების ომების მიწურულს ანაკინი მოექცა ძალის ბნელ მხარეს და ჯედაებს უღალატა. მისი ახალი ბატონის, უზენაეს კანცლერ პალპატინის ცნობილი, 66-ე ბრძანების თანახმად, დაიწყო ჯედაების განადგურება, თუმცა კენობი გადარჩა და იოდა იპოვა. პლანეტა მუსტაფარზე ობი-ვანი შეებრძოლა ანაკინს, რომელიც იმ დროისთვის უკვე დართ ვეიდერი გახდა. ფაქტობრივად დამწვარი და განადგურებული ვეიდერი გადაარჩინა პალპატინმა. ვეიდერი ჩასვეს ჯავშანში, რომელიც ამავე დროს მის სიცოცხლისუნარიანობას მართავდა. რესპუბლიკა იქცა იმპერიად. კენობი დასახლდა ტატუინზე, სადაც ანაკინის ახალშობილი შვილებიდან ერთ-ერთი, ლუკი, აღსაზრდელად დაუტოვა ბერუ და ოუენ ლარსებს.
ჩვიდმეტი წლის თავზე კენობი კვლავ შეხვდა დართ მოლს და დაამარცხა იგი. მის ხელთ მომაკვდავმა სითმა უწინასწარმეტყველა, რომ ლუკი იძიებდა შურს მათი ბედისწერის გამო.
ორი წლის შემდეგ კენობიმ იხილა R2-D2-ის მიერ მოტანილი გზავნილი ლეია ორგანასგან და ლუკთან ერთად უკანასკნელის დასახმარებლად გაემგზავრა. მიუხედავად იმისა, რომ გადაწყვიტა სკაიუოკერის როგორც ჯედაის მომზადება, სიკვდილის ვარსკვლავის ერთ-ერთ დონეზე ყოფნისას შეხვდა ვეიდერს და განგებ დაამარცხებინა თავი, რათა ლუკს, ლეიას და სხვებს მოესწროთ პლანეტიდან გაქცევა.
მოგვიანებით, სანამ ლუკი აჯანყებულთა ალიანსის წევრი იყო, კენობი დროდადრო ჩნდებოდა მის წინაშე აჩრდილის სახით. სწორედ მან მიუთითა სკაიუოკერს პლანეტა დაგობაზე, სადაც ლუკს შემდგომში იოდა ჯედაების სიბრძნეს უზიარებდა.
ცხოვრება[]
ადრეული წლები[]
- „როგორც ჯედაები, ოჯახებს ბავშვობისას ვტოვებდით. აქამდე აქა-იქ მაგონდება დედის თავსაფარი, მამის ხელები. ბავშვი მახსოვს. [...] მე მგონია, ძმა მყავდა. ნამდვილად არ მახსოვს. ნეტავ, მახსოვდეს.“
- ―ობი-ვან კენობი
ობი-ვან კენობი სინორჩისას
ობი-ვან კენობი დაიბადა იავინის ბრძოლამდე 57 წლით ადრე[2], პლანეტა სტიუჯონზე[5]. როგორც ძალისადმი მგრძნობიარე, იგი წაიყვანეს ჯედაების ტაძარში, კორუსანტზე, სადაც სამი წლის ასაკში გადიოდა ჯედაის წვრთნას[5][18], რაც უკვე უჩვეულო იყო, ვინაიდან სხვა ბავშვებს ამზადებდნენ უკვე ექვსი თვის ასაკიდან.[19] იგი საბოლოოდ შეარჩიეს როგორც პადავანი და კენობი დადიოდა მედიტაციასთან დაკავშირებულ შეკრებებზე.[11] სინორჩისას ეუფლებოდა ჯედაის ხელოვნეას დიდ ოსტატ იოდას ზედამხედველობით[6], შემდეგ კი გახდა ოსტატ ჯედაი კვაი-გონ ჯინის პადავანი.[18] ჯინმა ასწავლა, რომ „თავშეკავებულობაში იყო ძალა და კეთილშობილება“.[20] მოგვიანებით ბიჭუნა გადიოდა სინათლის მახვილით ბრძოლისთვის მომზადებას და კვაი-გონს მოეწონა მისი უნარები, რაც აღნიშნა კიდეც.[11] აღსანიშნავია, რომ კენობიმ ჯინთან ერთად, პადავანობის დროს, შეასრულა მისია ლა'მუზე მდებარე ტყეში.[18]
სატინ კრიზის დაცვა[]
- „შენ და სატინს წარსული გაკავშირებთ.“
„დიდი მისია, რომელსაც ახალგაზრდობისას ვასრულებდი. ოსტატი კვაი-გონი და მე ერთი წელი მანდალორზე ვიცხოვრეთ და ჰერცოგინიას ვიცავდით აჯანყებულებისგან, რომლებიც მის პლანეტას საფრთხეს უქმნიდნენ. მათი დავალებით ჩვენ ჯილდოზე მონადირეები გვეძებდნენ. მუდმივად გავრბოდით, გვშიოდა, არ ვიცოდით, მეორე დღეს რა გველოდა.“ - ―ობი-ვან კენობის და ანაკინ სკაიუოკერის საუბრიდან
ადრეულ წლებში ობი-ვანი და მისი ოსტატი კვაი-გონ ჯინი ერთი წლის განმავლობაში მანდალორზე ცხოვრობდნენ, სადაც მმართველ სატინ კრიზს იცავდნენ. ჯედაების მოსაკლავად გააგზავნეს ჯილდოზე მონადირეები, ამიტომ კვაი-გონიც და ობი-ვანიც მუდმივად დევნილებივით იყვნენ, ბუნდოვანი მომავლით. ამ პერიოდში დრაბუნზე მოხდა შეტაკება. მის დროს კენობიმ სცადა, გადაერჩინა კრიზი, რომელმაც მოგვიანებით დაზიანებები მიიღო. მანდალორზე ცხოვრებისას მას შეუყვარდა ჰერცოგინია, მაგრამ მიუხედავად გრძნობებისა, განაგრძო კვაი-გონისგან დარიგებების მიღება და ჯედაების სწავლების ერთგული დარჩა. მართალია, განიცდიდა კრიზის მიტოვებას, იგი მაინც დაემორჩილა მათ კოდექსს[22].
ნაბუზე შეჭრა[]
კვაი-გონი და ობი-ვანი ესაუბრებიან ჯა ჯა ბინკსს.
იმ დროისთვის, როდესაც ჯინი უკვე დარწმუნებული იყო, რომ კენობი მზად იყო გამოცდისთვის, უზენაესმა კანცლერმა ფინის ვალორუმმას ორივე გააგზავნა სავაჭრო ფედერაციასთან მოსალაპარაკებლად, რომელმაც მოახდინა ნაბუს ბლოკადა. თუმცა, მოლაპარაკება ვერ განხორციელდა, ვინაიდან ვიცე-მეფე ნუტ განრეიმ ჯედაებს მოსაკლავად მიუგზავნა B1 საბრძოლო დროიდები და დროიდეკები, მაგრამ ისინი ნაბუზე ჩამოსხდნენ.
ნაბუზე კენობიმ და ჯინმა გაიცნეს განგანი ჯა ჯა ბინკსი, რომელმაც ორივე მიიყვანა ოტო განგაში, სადაც ისინი შეხვდნენ განგანების მეთაურ ბოს რუგორ ნასს. მართალია, განგანები ნაბუს ხალხის დასახმარებლად ვერ დაითანხმა, ჯინმა გონების მოტყუებით ნასს გამოსტყუა ტრანსპორტი, რომლითაც ჯა ჯასთან ერთად ორივე თიდისკენ გაემგზავრა. მიჰყავდათ რა ტრანსპორტი პლანეტის ბირთვის გავლით, თიდში ჩასულებმა აღმოაჩინეს, რომ სავაჭრო ფედერაციამ უკვე დაიპყრო ქალაქი. დედოფალ ამიდალასა და სხვების გადარჩენის შემდეგ ჯედაებმა ამიდალა ნაბუდან კოსმოსური ხომალდით წაიყვანეს, რათა კორუსანტზე ჩაეტანათ პლანეტაზე შეჭრის ამბები. გაქცევისას ხომალდის ჰიპერძრავა დაზიანდა, რის გამოც კორუსანტამდე ვერ მიაღწიეს და იძულებულნი იყვნენ, ტატუინზე შემცვლელი დეტალის საძიებლად გაჩერებულიყვნენ.
პლანეტაზე კენობი ხომალდზე დარჩა, ხოლო ჯინმა, ამიდალამ (რომელიც გადაცმული იყო მსახურად), ბინკსმა და R2-D2-მა დაიწყეს ძრავის ძიება. მოგზაურებმა გაიცნეს ანაკინ სკაიუოკერი, რომლის სისხლის სინჯებში ობი-ვანმა აღმოაჩინა მიდიქლორიანების ნებისმიერ სხვა ჯედაისთან შედარებით ყველაზე მაღალი რიცხვი. ჯინმა პლანეტა უკვე სკაიუოკერთან ერთად დატოვა, მაგრამ მანამდე მათ თავს დაესხა დართ მოლი. მოგზაურებმა პლანეტა სასწრაფოდ დატოვეს.
ობი-ვანი ჰპირდება ანაკინს, რომ მისი მასწავლებელი იქნება.
კორუსანტზე ჩასვლისთანავე ჯინმა და კენობიმ პირდაპირ მიაშურეს ჯედაების საბჭოს და აცნობეს იდუმალი თავდამსხმელის შესახებ, რომელიც ჯინის აზრით სითების ლორდი იყო. დაკითხვის შემდეგ ჯინმა აგრეთვე ისაუბრა სკაიუოკერზე, დარწმუნებული იყო რა, რომ ბიჭუნა იყო რჩეული. მიუხედავად ამისა, საბჭოში მიაჩნდათ, რომ ბიჭის ჯედაების ხელოვნებაში დაოსტატება არ შეიძლებოდა. თუმცა, ჯინი მაინც აცხადებდა, რომ მას პადავანად აიყვანდა. ვინაიდან კენობი უკვე იყო მისი პადავანი, ობი-ვანმა თავად გამოხატა სურვილი, ანაკინის მასწავლებელი ყოფილიყო და კვაი-გონი დათანხმდა. საკითხის განხილვა აღარ გაგრძელდა — მეის უინდუმ ორივე კვლავ ნაბუზე გააგზავნა, რათა დაეცვათ დედოფალი და დაედგინათ, თუ ვინ იყო იდუმალი თავდამსხმელი.
დაბრუნდა რა ნაბუზე, ბინკსმა იპოვა განგანები და ამიდალა (რომელიც ნამდვილი დედოფალი აღმოჩნდა) და სთხოვა ნასს დახმარება ფედერაციის დროიდებთან ბრძოლაში. ნასი დათანხმდა ამიდალას მიერ წარმოთქმული დიპლომატიური მიმართვის შემდგომ. სანამ ბრძოლა მიმდინარეობდა, ამიდალას ლაშქარი შეიჭრა თიდში და განრეი დააპატიმრა. თუმცა, მოლს კვლავ შეხვდნენ და ორივე ჯედაი მას დაუპირისპირდა, რათა ამიდალას მოესწრო სამეფო დარბაზში შეღწევა. მოლთან დუელისას კენობი მასწავლებლისგან შორს აღმოჩნდა და თავად იხილა, როგორ მოკლა მოლმა ჯინი. როგორც კი მიაღწია სითამდე, კენობიმ განაგრძო ბრძოლა და მტერი მოკლა, გაკვეთა რა ორ ნაწილად გაკვეთა. შემდეგ ჯედაიმ მომაკვდავ ჯინს შეჰფიცა, რომ სკაიუოკერს აათვისებინებდა ჯედაების ხელოვნებას[13].
ანაკინის მასწავლებელი[]
ადრეული წლები[]
ნაბუს ბრძოლის მოვლენების შემდგომ კენობი საბჭოს გადაწყვეტილებით გახდა რაინდი ჯედაი, ხოლო იოდამ მოიწონა ის, რომ კენობის უნდა მოემზადებინა ანაკინი. ობი-ვანი დაესწრო ჯინის დასაფლავებას, სადაც ბიჭუნად დაუდასტურა საკუთარი მიზნები. მოგვიანებით იგი, ანაკინთან ერთად, თიდზე ესწრებოდა გამარჯვების აღსანიშნავ ცერემონიას.[13]
გავიდა დრო და კენობი და სკაიუოკერი გაემგზავრნენ პლანეტა ილუმზე, სადაც პადავანს, წესის თანახმად, უნდა აეწყო საკუთარი მახვილი[23]. მახვილის წარმატებული აწყობის შემდეგ კენობიმ ბიჭუნას უთხრა, რომ ეს იარაღი მისი სიცოცხლე იყო[24][25]
ერთ-ერთი მოგზაურობისას კენობი ჩავარდა გუნდარკების ბუდეში და იგი ანაკინს უნდა გადაერჩინა.[26]
ნაბუს ბრძოლიდან სამი წლის შემდეგ სკაიუოკერი ცდილობდა სხვა პადავანებზე შთაბეჭდილების მოხდენას. ჯედაების ტაძარში მომზადებისას მან დაამარცხა საწვრთნელი დროიდი, რომელიც ისე იყო დაპროგრამებული, რომ იქცეოდა და გამოიყურებოდა სითივით. მის წვრთნას თვალს ადევნებდნენ მეის უინდუ, კენობი და უზენაესი კანცლერი პალპატინი.[27] მოგვიანებით ანაკინი ეუფლებოდა არსებათა მორჯულების ხელოვნებას, როდესაც იგი კანცლერმა იხმო. მას პალპატინთან ობი-ვანი გაჰყვა. კანცლერმა ობი-ვანს სთხოვა ბიჭუნას დროებით დატოვება და ანაკინთან ერთად კაბინეტი დატოვა[28].
ჯედაების ტაძარში დაბრუნებულმა ანაკინმა მასწავლებელს ამცნო, რომ ორდენის დატოვებას აპირებდა, ვინაიდან არ მოსწონდა, რომ მთელი მისი სიცოცხლე უკვე განსაზღვრული იყო, თუმცა თავად მხოლოდ ცხრა წლის იყო. მან ობი-ვანს გადასცა სინათლის მახვილი. მართალია, კენობიმ იგი გამოართვა, შეგირდს შესთავაზა, კვლავ ეფიქრა ამ გადაწყვეტილების შესახებ.[29]
მისია კარნელიონ IV-ზე[]
სანამ ანაკინი პასუხს გასცემდა, იოდას თხოვნით, შეგირდი და მასწავლებელი, კარნელიონ IV-იდან მოსულ იდუმალი სიგნალის საპასუხოდ აღნიშნულ პლანეტაზე გაემგზავრნენ. გზად მათი ხომალდი დაზიანდა პლანეტის ატმოსფეროში შეღწევისას და ორივე ავარიულად დაეშვა კელადონის ზღვაში. მოგვიანებით, იხილა რა ირგვლივ სიცოცხლის ნიშნები, კენობიმ სკაიუოკერს დაუბრუნა სინათლის მახვილი. უცნობი ხომალდის ავარიისას ჯედაებმა მისი ეკიპაჟი გადაარჩინეს, შეაყოვნეს რა დამხობა.[27]
გადარჩენილებმა, კოლარამ და დედამისმა, პრანმა, არ იცოდნენ გაგზავნილი სიგნალისა თუ ჯედაების შესახებ[27]. კენობიმ გონების ხრიკით პრანი აიძულა, იარაღი დაეშვა. თუმცა, მათ თავს სხვა ხომალდი დაესხა. ობი-ვანმა იგი სინათლის მახვილით გაანადგურა და შეაჩერა პილოტი, გრეკერი, რომელსაც სხვებისთვის უნდა ესროლა. მას შემდეგ, რაც ანაკინმა ბლასტერები გაანადგურა, კენობიმ გადააგდო პრანისა და კოლარას კუთვნილი დანები.
ობი-ვანმა დაარწმუნა გრეკერი, კოლარა და პრანი, რომ აუცილებელი იყო მათი უსაფრთხო ადგილზე გადაყვანა. მოგზაურობისას ისინი შეხვდნენ გვამის-წურბელებს. კენობიმ და სკაიუოკერმა იშიშვლეს მახვილები და ძალის მეშვეობით სცადეს კავშირის დამყარება, თუმცა — უშედეგოდ.[28]
კენობის არ სურდა კოლარასთვის ან მისი დედისთვის სიგნალის წყაროს კოორდინატების გადაცემა. გრეკერს მან საიდუმლოდ უამბო, რომ სკაიუოკერი იყო არა მისი ძე, არამედ შეგირდი. გვამის-წურბელებისგან ხომალდის დაცვისას პრანმა და კოლარამ გაიტაცეს ანაკინი და ხომალდი დატოვეს, შემდეგ კი გაანადგურეს.[30]
აფეთქებამდე კენობიმ და გრეკერმა მოასწრეს ხომალდის დატოვება. ძალის გამოყენებით კენობი დაუკავშირდა სხვა არსებებს. იგი ცდილობდა, გრეკერისგან დაედგინა, თუ სად შეიძლებოდა, წაეყვანათ პადავანი, მაგრამ გრეკერმა არაფერი იცოდა. ამიტომ, ობი-ვანი მას უბრალოდ გაჰყვა. მას შემდეგ, რაც ერთად მიაგნეს სიგნალის წყაროს, მათ დაესხა უცნობი არსება. გრეკერმა მას ცეცხლი გაუხსნა. კენობი და გრეკერი იბრძოდნენ, სანამ მათ მიაგნებდა შენიღბული ადამიანი. კენობიმ მოასწრო შეღწევა, სანამ გრეკერი კარს დახურავდა. უცნობმა, რომელიც სერა აღმოჩნდა, უამბო კენობის, რომ სწორედ მან გააგზავნა სიგნალი. მან ჯედაის აგრეთვე უჩვენა რელიქვიების კოლექცია და აუხსნა, რომ გახსნილნიც და დახურულნიც მასზე ნადირობდნენ.[29]
კენობიმ მოისმინა, თუ როგორ გააგზავნა სერამ სიგნალი და როგორ შეიტყო ჯედაებისა და სითების არსებობის შესახებ. სერასთან ერთად ობი-ვანმა იხილა, თუ როგორ ანადგურებდნენ გრეკერის ძალები ტაძარს, რომელშიც იმყოფებოდნენ. სერა სთხოვდა კენობის, მოეკლა იგი, მაგრამ ეს ჯედაების კოდექსს დაარღვევდა, ამიტომ ობი-ვანმა უარი უთხრა. შემდეგ იგი გაესაუბრა გრეკერს და დაარწმუნა, შეეჩერებინა იერიში. თუმცა, ამ დროს ტაძარს შეუტია დედა პრანმა. კენობი მოულოდნელად გადაარჩინა ანაკინმა, რომელიც ობი-ვანმა მოგვიანებით შეიყვანა სერას საკომუნიკაციო ოთახში. იქიდან ანაკინმა შეძლო პლანეტიდან სიგნალის გაგზავნა. დასახმარებლად მოსულმა რესპუბლიკისა და ჯედაების გაერთიანებულმა ძალებმა დაასრულეს მხარეთა დაპირისპირება.[31]
სეპარატისტული კრიზისი[]
სენატორ ამიდალას დაცვა[]
- „ხომ იცი, არ მიყვარს, როდესაც ამას აკეთებ!“
„მაპატიეთ, მასწავლებელო. დამავიწყდა, რომ ფრენა არ გიყვართ.“
„ფრენას არა უშავს, შენი ქმედება კი თვითმკვლელობაა!“ - ―ობი-ვან კენობი და ანაკინ სკაიუოკერი
კენობი და მისი პადავანი ხვდებიან პადმე ამიდალას.
კორუსანტზე სენატორ ამიდალას მკვლელობის მცდელობის და ანსიონზე სასაზღვრო უთანხმოების შემდეგ ჯედაების საბჭომ უზენაეს კანცლერ შივ პალპატინის თხოვნით კენობი და სკაიუოკერი სენატორთან გააგზავნა, რათა მათ იი დაეცვათ. კენობი გრძნობდა შეგირდის აღელვებას და გააფრთხილა მოვალეობათა შესრულებისას გადაჭარბების შესახებ. მაგრამ ამიდალამ მოგვიანებით მათ შესთავაზა მატყუარის როლი, რომელსაც თავად ითამაშებდა, რათა დაედგინათ, თუ ვინ ცდილობდა მის მოკვლას.[26]
იმავე ღამით ზემ უესელმა შხამიანი კუჰუნის მეშვეობით სცადა სენატორის მოკვლა, მაგრამ მისი გეგმები ჩაიშალა. კენობი გაჰყვა მის მზვერავ დროიდს და ზამს მიაგნო. სკაიოკერის დახმარებით იგი მონადირეს მისდევდა კორუსანტის ქუჩებშ, არსების სპიდერის ავარიამდე. მომაკვდავი უესელი აღმოჩნდა კლოუდიტი. კენობიმ სცადა მისგან დამკვეთის შესახებ ინფორმაციის მოპოვება, მაგრამ მაქცია მოკლული მოკლა ჯენგო ფეტის ტოქსიკურმა ხელშუბმა.[26]
კენობი არქივებში.
კენობი და სკაიუოკერი სხვადასხვა დავალებით გაემგზავრნენ. ობი-ვანი განაგრძობდა ამიდალაზე მონადირეთა ძიებას, ხოლო სკაიუოკერი გაჰყვა სენატორს ნაბუზე და იცავდა მას. მიუხედავად იმისა, რომ დარწმუნებული იყო, რომ ანაკინი არ იყო მზად ასეთი დავალების მისაღებად, ჯედაების საბჭომ საკუთარი გადაწყვეტილება მიიღო. კენობიმ ტოქსიკური ხელშუბი უჩვენა ძველ მეგობარ დექსტერ ჯეტსტერსმ, რომელმაც მიანიშნა, რომ ეს უნდა ყოფილი კამინოური მახვილისებრი ხელშუბი. კამინოზე მოპოვებული ინფორმაციით კენობი შეისწავლა არქივები, მაგრამ იქ აღნიშნული სისტემის შესახებ ვერაფერი იპოვა. ჯოკასტა ნიუმ მას განუმარტა, რომ სისტემა არ არსებობდა, თუკი ის რუკებზეც არ იყო. მაგრამ ობი-ვანმა მიმართა კიდევ ერთ ხერხს — იოდას და მის ნორჩ მოწაფეებს. ორივე ჯედაიმ საერთო დასკვნა გამოიტანა — ვიღაცამ არქივებიდან წაშალა ინფორმაცია კამინოს შესახებ და აუცილებელი იყო დაკარგული პლანეტის ადგილმდებარეობის დადგენა.[26]
კლონების ჯარის აღმოჩენა[]
ობი-ვან კენობის შეხვედრა კამინოანებთან.
კამინოზე კენობის შეეგება კამინოანი ტონ ვე, რომელმაც ჯედაის უამბო, რომ მას ელოდნენ. მან ობი-ვანს გააცნო პრემიერმინისტრი ლამა სუ, რომლის თქმით, საიფო-დიასი იამაყებდა კლონების იმ ჯარით, რომელიც მისი თხოვნით რესპუბლიკისთვის შეიქმნა. კენობის უჩვენეს კლონების წარმოების და აღზრდის მაგალითები და სწორედ ადგილობრივებისგან მან შეიტყო, რომ მათთვის ნიმუშად გამოიყენეს ჯენგო ფეტი. შეხვედრისას ჯედაი ჯენგოს დაუსვა რამდენიმე კითხვა უკანასკნელ პერიოდში კორუსანტზე მისი მოხვედრის შესახებ.[26]
ობი-ვან კენობის შეხვედრა ჯენგო ფეტთან.
ამ შეხვედრის შემდეგ ჯენგომ და მისმა კლონმა ძემ, ბობა ფეტმა, სცადეს გაქცევა ხომალდ „მონა I“-ით. ჯედაი შეერკინა ჯენგოს და ასაფრენ პლატფორმაზე ბრძოლა გაიმართა, რომლის მიწურულს ობი-ვანი გადავარდა და ჯენგო დარწმუნებული იყო, რომ კენობი ზღვაში ჩაიძირა. თუმცა, იგი სინამდვილეში ჩაეჭიდა ხიდს და პლატფორმაზე დაბრუნდა. მან მაინც მოასწრო ხომალდზე შუქურის დამაგრება, რათა მისი ადგილმდებარეობისთვის თვალი ედევნებინა.[26]
ობი-ვანის დაჭერა ჯეონოსისზე[]
- „უნდა შემომიერთდე, ობი-ვან. ერთად დავამხობთ სითებს!“
„არასოდეს შემოგიერთდები, დუკუ.
"შენი გათავისუფლების უზრუნველყოფა რთული იქნება.“ - ―გრაფი დუკუ და ობი-ვან კენობი
კენობი, დატყვევებული ჯეონოსისზე.
ჯენგოს და მის „მონა I“-ს კენობიმ ჯეონოსისამდე სდია. ფეტმა სცადა მასზე სეისმური ყუმბარების გამოყენება. დააჯერა რა, რომ მათ შეეწირა, კენობი პლანეტაზე დაეშვა და ახლომახლოს აღმოაჩინა სავაჭრო ფედერაციის რამდენიმე ხომალდი. მეტიც, მან შეაღწია და მოისმინა, თუ როგორ მიმართავდა გრაფი დუკუ სეპარატისტულ საბჭოს და როგორ ახსენა ნუტ განრეის ბრძანებით ამიდალაზე თავდასხმა. იცოდა რა, რაოდენ მნიშვნელოვანი იყო ეს ინფორმაცია, კენობიმ ტატუინზე სკაიუოკერს გზავნილი გაუგზავნა, ვინაიდან კორუსანტამდე სიგნალი არ აღწევდა. თუმცა, ამ გზავნილის დასრულებამდე, ჯედაი სეპარატისტებმა დაიჭირეს და საპყრობილეში შეაგდეს. იქ მას დუკუ ეწვია და უამბო, რომ რესპუბლიკაში გავლენიანი პირი იყო სითი ლორდი, დართ სიდიუსი. მან სცადა კენობის დათანხმება და შესთავაზა სიდიუსის წინააღმდეგ ერთად ბრძოლა, მაგრამ ჯედაიმ ამაზე უარი განაცხადა.[26]
კლონების ომები[]
- „მაშ, ამ შეტევას გენერალი კენობი ხელმძღვანელობს. თავისი გაიძვერობით ცნობილია.“
- ―სეპარატისტების მეთაური TX-20, ობი-ვანის შესახებ
ჯეონოსისის პირველი ბრძოლა[]
- „არა, მე ჯეონოსისზე პირველ შეტევაში არ ვმონაწილეობდი.“
„ბევრი არ გაგიცდენია. ბოლოს ბოძზე მიმაჯაჭვეს და თავს რამდენიმე უშველებელი ურჩხული დამესხა.“
„საინტერესოა.“
„ჯეონოსელები იყვნენ.“ - ―კოდი და ობი-ვან კენობი
პეტრანაკის არენაზე სასიკვდილოდ განწირულ კენობის გარდა იმყოფებოდნენ სკაიუოკერი და ამიდალა. მიუხედავად იმისა, რომ ერთად დაამარცხეს სამი ურჩხული — რიკი, აკლაი და ნექსუ — ისინი გადაარჩინეს ჯედაებმა მეის უინდუს მეთაურობით. უკანასკნელები დაუპირისპირდნენ დროიდების დიდ ჯარს, მაგრამ არენის ცენტრში ალყაში მოექცნენ. დახმარება გამოჩნდა ოსტატ იოდასა და კლონების ჯარის სახით. მათ გადაარჩინეს ჯედაები და ამიდალა. კენობი უკანასკნელებთან ერთად მგზავრობდა.
კენობისა და დუკუს დუელი ჯეონოსისზე.
მათ საკუთარი სპიდერით დუკუ დაედევნა. მართალია, ამიდალა ხომალდიდან უდაბნოს ქვიშებში დაეცა, ანაკინმა ობი-ვანის მითითებით ემოციების გამოვლენისგან თავი შეიკავა და, მასწავლებელთან ერთად, დუკუს დაედევნა. სითების მხარეს გადასულმა ყოფილმა ჯედაიმ დაჭრა კენობი, ხოლო სკაიუოკერს მარჯვენა ხელის მტევანი მოჰკვეთა. მასთან ბრძოლას იოდა შეეცადა, მაგრამ გრაფმა ძალის მეშვეობით ჩამოამხო ჭერი. ამრიგად, იოდამ ყურადღება გადაიტანა ჭერის შეკავებაზე, ხოლო დუკუ გაიქცა.[26]
ჯედაების კორუსანტზე დაბრუნების შემდეგ კენობი იოდას და უინდუს ჯედაების საბჭოს კაბინეტში შეხვდა, რათა ესაუბრა დატრიალებულ მოვლენებზე. მიუხედავად იმისა, რომ მან აღნიშნა კლონების დიდი წვლილი, იოდას აზრით, ეს არა გამარჯვება, არამედ კლოთა ომების დასაწყისი იყო.[26]
ქურდის დაჭერა[]
- „ყველა არა, დექს. მეგობრები რისთვის არსებობენ?“
- ―ობი-ვან კენობი დექსტერ ჯეტსტერს
ობი-ვანი და ტრი ტელონი.
დექსის სასადილოში პა'ლოვიკმა ქურდმა ტრი ტელონმა კენობისგან ნივთი მოიპარა. იგი კოკოს რაიონის გავლით საკუთარი ბუნაგისკენ გაიქცა, რომელშიც მაგრედასთან ერთად ცხოვრობდა. თუმცა, იქ მას დახვდა კენობი, რომელმაც განუმარტა, რომ ეს ნივთი იყო უბრალოდ ქაღალდში გახვეული სათვალთვალო მოწყობილობა. ამ დროს ბუნაგში შემოვიდა დექსტერიც, რომლის თხოვნით კენობიმ მოატყუა ტელონი, ვინაიდან უკანასკნელი კლიენტების ნივთებს მანამდეც იპარავდა. დექსტერმა ჯედაის მადლობა გადაუხადა და უთხრა, რომ მასთან ვალში იყო.[34]
შემდგომი მოვლენები ქრისტოფსისამდე[]
კლონების ომების პერიოდში ობი-ვანი გახდა გენერალი ჯედაი, რესპუბლიკის დიადი ჯარის წინამძღოლი. მისი მეთაურობით რესპუბლიკის ძალებმა არაერთი გამარჯვება იზეიმეს. პიროვნული თვისებების გამო ჯედაის „შუამავალი“ შეარქვეს.[19] მის შეგირდ სკაიუოკერს ომის დროს რაინდ ჯედაის წოდება მიენიჭა,[35] ხოლო 212-ე მოიერიშე ბატალიონი კენობის დაქვემდებარებაში გადავიდა.[10][32][33][36][37] კლონების ომების ადრეულ ეტაპზე ობი-ვანი შეხვდა დროიდების ჯარის უზენაეს მეთაურს, გენერალ გრივუსს. უკანასკნელს ჯედაისადმი ზიზღი და მოკვლის სურვილი დასჩემდა და ისინი პირისპირ კიდევ ბევრი ბრძოლისას შეხვდნენ.[38]
ამ პერიოდში ობი-ვანმა ახალი მახვილი ააწყო, რომელიც უკვე სიცოცხლის ბოლომდე შეინარჩუნა.[4][10]
ომის ადრეულ წლებში ჯედაების ტაძრის ცენტრალური უსაფრთხოების სადგურზე კენობიმ ნორჩებს ჩაუტარა გაკვეთილი ჯედაების ხმობის სიგნალის შესახებ. კელებ დიუმმა მას უნებლიედ მიაწოდა იდეა ისეთი სიგნალის შესახებ, რომელიც ჯედაებს პირიქით, ტაძარს აარიდებდა[39]. ეს მეთოდი კენობიმ წარმატებით გამოიყენა რესპუბლიკის დაცემის დროს.[10]
ქრისტოფსისი და ტეთი[]
კენობი და სკაიუოკერი ასრულებდნენ მისიას, რათა ქრისტოფსისზე სეპარატისტული ბლოკადის შედეგად გამომწყვდეულ სენატორ ბეილ პრესტორ ორგანასთვის და რესპუბლიკის ძალებისთვის მიეწოდებინათ სურსათი. კენობიმ, რომელიც პლანეტაზე შეგირდზე უფრო გვიან მოხვდა, ჩაიყვანა რესპუბლიკის დაქვემდებარებაში არსებული უხილავი ხომალდი და ანაკინს მისცა მითითება, ხომალდით ბლოკადისთვის თავი დაეღწია და სურსათი პლანეტაზე ფარულად ჩაეტანა. თუმცა, ანაკინმა ხომალდი გამოიყენა ადმირალ ტრენჩზე თავდასხმისთვის და ბლოკადა წარმატებული შეტევით გაარღვია. კენობის სხვა არაფერი დარჩენო, გარდა სკაიუოკერის საქციელის მოწონებისა.[40]
კოსმოსური შეტაკების შემდეგ ორივე გენერალი ჯედაი, კლონ ჯარისკაცებთან ერთად, პლანეტაზე ჩავიდა. დაიწყო ქრისტოფსისის გათავისუფლების ოპერაცია. კენობის უპირატესობის შესუსტების შემდეგ ეს მისია შეწყდა და მათ უკან დაიხიეს, თუმცა მანამდე კაპიტანმა რექსმა მოიპოვა T-სერიის ტაქტიკური დროიდის დაზიანებული თავი. მან და კოდიმ ერთად დაიწყეს კლონების შორის მოღალატის ძიება, ხოლო სეპარატისტების შტაბ-ბინაში კენობი და სკაიუოკერი დაუპირისპირდნენ ასაჟ ვენტრესს და მანამდე სდიეს, სანამ ქრისტოფსისის ასაღებად მომზადებულ სეპარატისტულ ჯარს აღმოაჩენდნენ. საკომანდო ცენტრზე დაბრუნებულმა ჯედაებმა აღმოაჩინეს, რომ რექსმა და კოდიმ დაადგინეს მათ რიგებში მოღალატის ვინაობა — ეს იყო სლიკი. მათ აგრეთვე იხილეს უამრავი განადგურებული ქვემეხი და AT-TE.[41]
გარკვეული დროის შემდეგ კენობიმ და სკაიუოკერმა სურსათისთვის ხომალდი გააგზავნეს, მაგრამ ობი-ვანმა ამ გადაწყვეტილების მიღება ინანა, ვინაიდან მათ სეპარატისტთა მეორე ტალღამ დაარტყა. გაცხარებული ბრძოლისას რესპუბლიკის ძალებმა შეძლეს მხტრის დროებით მოგერიება, მაგრამ აშკარა იყო, რომ საჭიროებდნენ დამატებით ძალებს. სწორედ მაშინ კენობის შეხვდა ასოკა ტანო, რომელმაც გადასცა შეტყობინება და მითითება, დაბრუნებულიყვნენ კოსურანტზე ახალი მისიის შესასრულებლად. თუმცა, სეპარატისტული საშიშროების გამო იქაურობის დატოვება შეუძლებელი იყო. დამატებითი ძალების მოლოდინში და მორიგი შეტევის ქვეშ მყოფმა რესპუბლიკის ძალებმა შეიმუშავეს ახალი გეგმა. კენობიმ ნება დართო ანაკინსა და მის პადავანს, დაევლოთ ბრძოლის ველი და გაენადგურებინათ მტრის ამრეკლი ფარების გენერატორი. თავად ობი-ვანი ამასობაში იგებდა დროს გენერალ ლოთსომთან ყალბი მოლაპარაკებების გამართვით.[42]
სკაიუოკერისა და ტანოს მიერ გენერატორის დროული განადგურების შემდეგ, კენობიმ დაიჭირა ლოთსომი და შეხვდა დამატებით ძალებთან ერთად მოსულ იოდას. უკანასკნელმა იგი ჯაბასთან მოსალაპარაკებლად გაგზავნა, რათა მიეღწიათ გარე რგოლის ტერიტორიებში სავაჭრო მარშრუტების გამოყენების მეშვეობით სურსათის ტრანსპორტირებისთვის. მაგრამ ამ დროს გრაფ დუკუს ბრძანებით გატაცებული იყო ჯაბას შვილი, როტა. კენობიმ დაარწმუნა ჰატი, რომ ჯედაები მის შვილს იპოვნიდნენ. ამის შემდეგ იგი გაემგზავრა ტეთზე სკაიუოკერის დასახმარებლად და ბრძოლაში ჩაება, სადაც კვლავ შეხვდა ვენტრესს. მოგვიანებით იგი შეხვდა ასოკასა და ანაკინს — მას შემდეგ, რაც უკანასკნელებმა როტა ჯაბას უვნებელი დაუბრუნეს.[42]
ჯედაების საბჭოს კრება[]
ოსტატ ჯედაი პლო კუნის ფლოტის საიდუმლო სეპარატისული ხომალდ „ავის მომასწავებლის“ მიერ განადგურებამდე კენობი ჯედაებს საბჭოს წარმომადგენლებთან ერთად შეხვდა ბეილ ორგანას და სთხოვა ტოიდარიაზე მეფე კატუუნკოსთან შეხვედრა, რათა ესაუბრათ პლანეტის როგორც ტექნიკის ბაზის გამოყენებაზე.[43]
„ავის მომასწავებელი“[]
როდესაც აბრეგადოს ბრძოლაში ოსტატ პლო კუნის ფლოტი განადგურდა სეპარატისტების საიდუმლო სუპერიარაღით, „ავის მომასწავებლით“, ხოლო სკაიუოკერისგან ცნობილი გახდა პლო კუნის შეწყვეტილი გზავნილის შესახებ, კენობი კანცლერ პალპატინს, უინდუსა და იოდას შეხვდა. გადაწყდა, რომ სკაიუოკერი საკუთარი ძალებით კენობის ფლოტს დაეხმარებოდა. ანაკინის მოლოდინში კენობი დაუკავშირდა ჯედაებს და სთხოვა, შეხვედროდნენ. მას შეხვდა ფლოტი, მაგრამ არა გენერალი, ვინაიდან სკაიუოკერიც და ტანოც ამ დროს ცდილობდნენ პლო კუნისა და მისი თანმხლებთა გადარჩენას. კენობიმ ამცნო საბჭოს ამ დაუმორჩილებლობის შესახებ, მაგრამ აგრეთვე შეატყობინა, რომ შეხვდა სკაიუოკერის ფლოტს. მათ შეძლეს „ავის მომასწავებლის“ შესახებ მნიშვნელოვანი ინფორმაციის მოპოვება.[44]
შეიტყვეს რა, რომ „ავის მომასწავებლის“ შემდეგი სამიზნე იქნებოდა გარე რგოლში მდებარე კლონების სამედიცინო სადგური, კენობიმ და სკაიუოკერმა ჩამოაყალიბეს სახიფათო გეგმა, დაეპყროთ და გაენადგურებინათ „ავის მომასწავებლის“ ჩრდილების ესკადრილიის მეშვეობით. ვულფ იულარენთან ერთად, სამედიცინო ფრეგატების დახმარებით, კენობიმ განახორციელა სამედიცინო ცენტრის ევაკუაცია. მართალია, სკაიუოკერის ძალებმა წარმატებით გაანადგურეს „ავის მომასწავებლის“ ზარბაზნები, ხომალდი იმდენად დიდი იყო, რომ კენობის ფლოტისთვის წინააღმდეგობის გაწევა შეეძლო.[45]
ბრძოლისას, სისტემაში დიპლომატიური მისიის შესახებ არასწორი ცნობის გამო, ბრძოლისას მოულოდნელად სენატორი ამიდალა გამოჩნდა, რომლის ხომალდი „ავის მომასწავებელმა“ მიიზიდა სხივით. ამიტომ, გადაწყდა, რომ პადმეს სასწრაფოდ გადაარჩენდნენ. წარმატებული მისიისას კენობი, ხომალდის ჰიპერძრავის შესუსტების მცდელობისას, დაუპირისპირდა გრივუსს. სკაიუოკერის და ამიდალას დახმარებით, ყველა გაიქცა და „ავის მომასწავებელიც“ განადგურდა.[46]
რიშის მთვარე[]
რამდენიმე კვირის თავზე, გრივუსისა და მისი ფლოტის ძიებისას, კენობი და სკაიუოკერი გაემგზავრნენ მეთაურ კოდისა და კაპიტან რექსის დასახმარებლად, მას შემდეგ, რაც რიშის მთვარეზე მოხდა კლონების შეჯახება სეპარატისტულ ძალებთან. ჯედაების ფლოტი მალევე გამოჩნდა და გრივუსი სისტემიდან გააძევა, ჩაშალა რა გენერლის კამინოზე მოულოდნელი თავდასხმის გეგმა.[47]
გრივუსის თანდასხმები[]
სეპარატისტი გენერალი გრივუსი თავს ესხმოდა რესპუბლიკის ფლოტებს და მას შემდეგ, რაც რესპუბლიკა დამარცხდა ფალინზე, კენობიმ სკაიუოკერს ურჩია, ბოთავუი დაეტოვებინა. მაგრამ ანაკინმა, R2-D2-ის დაკარგვის ფასად გაანადგურა კიბორგის ფლოტილია.[48] გაღიზიანებული კენობი არცთუ დიდი ენთუზიაზმით დათანხმდა ზეციურ სადგურზე ასტრომექანიკოსის გადასარჩენად გამგზავრების გეგმას, თუმცა, ამასთან, სკაიუოკერს უსაყვედურა, უკანასკნელის დაუდევრობის გამო.[49]
დაჭერილი დუკუ[]
შემდგომში კენობიმ და სკაიუოკერმა განახორციელეს მისია და სცადეს კონფედერაციის ხელმძღვანელის, თავად გრაფ დუკუს შეპყრობა. როდესაც მათი მცდელობა, იგი საკუთარ ხომალდზე დაეჭირათ, წარუმატებელი აღმოჩნდა, ტანოს ძალების მეშვეობით დუკუ ავარიულად დაეშვა ვანკორზე. სანამ ობი-ვანი და ანაკინი მას ახლოს მდებარე გამოქვაბულში ეძებდნენ, დუკუმ გამოიყენა ძალა და გამოიწვია ზვავი. ჯედაები გამოქვაბულში გამოკეტილები აღმოჩნდნენ, ხოლო გრაფი გაიქცა.[50]
დუკუ დაიჭირეს მეკობრეებმა, რომლებიც აპირებდნენ მის რესპუბლიკისთვის დიდი გამოსასყიდის სანაცვლოდ გადაცემას. ამ მისიით მათთან კენობი და სკაიუოკერი გააგზავნეს. როდესაც მათ რესპუბლიკის ძალებს დაუდასტურეს, რომ დუკუ ნამდვილად დაპატიმრებული იყო, კანცლერმა პალპატინმა წარმომადგენელი ბინკსი და სენატორი ქარუსი გააგზავნეს დიპლომატიური მისიით, გამოსასყიდით[50]. კაპიტანმა ჰონდო ონაკამ, მეკობრეთა მეთაურმა, მოულოდნელად დააპატიმრა სკაიუოკერიც და კენობიც, იმედი ჰქონდა რა, რომ უფრო დიდ გამოსასყიდს მოიპოვებდა. ჯედაები გადაარჩინა ბინკსმა, თუმცა მისიას შეეწირა ქარუსი, ხოლო დუკუ გაიქცა.[51]
ორტო-პლუტონია[]
კენობი და სკაიუოკერი, ისევე, როგორც თავმჯდომარე ჩი ჩო და სენატორი რაიო ჩუჩი ერთხელ გაემგზავრნენ ორდო-პლუტონიაზე, რათა დაედგინათ, თუ რატომ დაიკარგა კონტაქტი იქაურ ბაზასთან. ადგილზე მათ აღმოაჩინეს, ხოლო ყველა კლონი და სეპარატისტთა სამხედრო წარმომადგენელიც მოკლული აღმოჩნდა. პლანეტაზე მივლენილები გაჰყვნენ კვალს და მიაგნეს ტალზებს. აღმოჩნდა, რომ დროიდები მათ თავს დაესხნენ, ხოლო კლონები უბრალოდ კონფლიქტს შეეწირნენ. ჯედაებმა, რომლებმაც უკვე იცოდნენ, რომ ტალზებს მარტო და მშვიდობიანი ცხოვრება სურდათ, მოაწყვეს უკანასკნელთა დიპლომატიური შეხვედრა პანტორანებთან.[52]
თუმცა, ჩი ჩოს ქედმაღლობის გამო, მასსა და თაი-სენს შორის წარმოიშვა კონფლიქტი. თავმჯდომარე აცხადებდა, რომ ეს პანტორას შიდა საქმეებს ეხებოდა. ჯედაებმა თხოვნით მიმართეს ჩუჩის, რათა პოლიტიკური უთანხმოება დიპლომატიურად გადაეწყვიტათ და ჩუჩი დაუკავშირდა პანტორას ასამბლეის წარმომადგენელს. უკანასკნელმა მას ნებართვა მისცა, ეზრუნა მშვიდობის დამყარებაზე და თავმჯდომარეს უფლებები შეუზღუდა. თუმცა, ყოველივე დაგვიანებული აღმოჩნდა — ჩი ჩოს დაესხნენ, სანამ ჯედაები და ჩუჩი ტალზების შეტევას შეაჩერებდნენ. კონფლიქტის მოგვარების მიზნით ჩუჩი თაი-სენებს შეხვდა და, გარკვეული შეთანხმების შედეგად, მიაღწია მათთვის პლანეტაზე მშვიდი ცხოვრების პირობებს. როდესაც სენატორი და ჯედაები პლანეტას ტოვებდნენ, კენობიმ სენატორს მიულოცა ეს მონაპოვარი და სთხოვა, მშვიდობა მუდმივად შეენარჩუნებინა, რათა ამით მაგალითი სხვებისთვისაც ეჩვენებინა.[52]
ვირუსი „ლურჯი აჩრდილი“[]
- „დიდი ნახტომი წინ ხოლმე მოითხოვს ორი ნაბიჯით უკან სვლას.“
- ―ობი-ვან კენობი
მოგვიანებით ჯედაების საბჭომ კენობი, სკაიუოკერი და ტანო მიავლინა ნაბუზე, ვინაიდან იქ სეპარატისტებმა შექმნეს ბიოლოგიური ლაბორატორია. სენატორი და ამიდალა და წარმომადგენელი ბინკსი თავად ეძებდნენ ამ ლაბორატორიას, მაგრამ მათთან კავშირი გაწყდა, ამიტომ სკაიუოკერმა ტანო განგან პეპი ბაუსთან ერთად გაუშვა. ამასობაში ანაკინმა და ობი-ვანმა გრეგარ ტაიფოსგან შეიტყვეს, რომ სეპარატისტი მეცნიერი ნუვო ვინდი ლაბორატორიას იყენებდა ვირუს „ლურჯი აჩრდილის“ გავრცელების მიზნით და გეგმავდა მის რესპუბლიკის მთავარ ვარსკვლავურ სისტემებში გაშვებას. ტანოსთან დაკავშირების შემდეგ კენობიმ და სკაიუოკერმა შეუტიეს ლაბორატორიას და შეუერთდნენ ტანოს, შემდეგ კი დაიწყეს ვინდის მიერ ვირუსული ყუმბარების ძიება. მიუხედავად იმისა, რომ მეცნიერმა სცადა ვირუსის გაშვება, მათ შეძლეს მისი შეჩერება და ამიდალასა და ბინკსის გათავისუფლება.[54]
კენობი ესაუბრება ანგელოზს.
ვინდის სასამართლო პროცესისთვის გადაყვანისას ტანომ, ამიდალამ და რამდენიმე კლონმა აღმოაჩინეს, რომ ვირუსის შემცველი ჭურჭელი გაუჩინარდა. მიუხედავად იმისა, რომ შეძლეს განგაშის სიგნალის გადაცემა, ეს მოქმედება დაგვიანებული აღმოჩნდა და ვინდის მომსახურე დროიდმა ყუმბარა აამოქმედა, რითაც ვირუსი მთელ ლაბორატორიაში გავრცელდა. ჯედაებმა იქაურობა დატოვეს და პლანეტა იეგოზე ეძებდნენ ვირუსის შხამსაწინააღმდეგო საშუალებას, რათა გადაერჩინათ ამიდალაც და ტანოც. იქ ყოფნისას, ჯეიბო ჰუდის დახმარებით, მათ გაათავისუფლეს ადგილობრივი მოსახლეობა სეპარატისტული უსაფრთხოების სისტემისგან, რომელიც მკვიდრებს არ აძლევდა პლანეტის დატოვების საშუალებას. შხამსაწინააღმდეგო საშუალების მოპოვების შემდეგ მათ გადაარჩინეს ტანო, ამიდალა და კლონების დიდი ნაწილი.[53]
რაილოთი[]
- „უნდა გვახსოვდეს, რატომ შევიკრიბეთ აქ. აქ ტვი'ლეკების დასახმარებლად მოვედით და არა მათი სახლის დასანგრევად.“
- ―კენობი მიმართავს ასეულ „აჩრდილს“
მას შემდეგ, რაც ტექნოკავშირის ხელმძღვანელმა უოტ ტემბორმა დაიპყრო რაილოთი და მისი მოსახლეობა, ჯედაების საბჭომ შეიმუშავა გეგმა, რომლის მიხედვით კენობი და მეის უინდუ წარუძღვებოდნენ სახმელეთო ოპერაციას, რათა გაეთავისუფლებინათ პლანეტა, ხოლო სკაიუოკერი და ტანო მათი დავალებით გაანადგურებდნენ რაილოთის ირგვლივ არსებულ სეპარატისტულ ბლოკადას. როგორც კი ანაკინის და ასოკას ოპერაცია წარმატებით ჩატარდა, დამატებითი ძალებით მათ შეუერთდა კენობიც.[55]
კენობი ატყუებს გატკარებს.
ვერ შეძლეს რა „კრამბ-ბომბდამშენიდან“ „მომწონებლის“ კლასის სადესანტო ხომალდების და სხვა მოიერიშე საშუალებათა გამოყენება, კენობი და ასეული „აჩრდილის“ შემადგენლობა დაეშვნენ რაილოთზე და უინდუმ გენერალ ჯედაის დაავალა სეპარატისტების ქვემეხების განადგურება, რათა ტრანსპორტს დაშვების საშუალება ჰქონოდა. თავდაპირველად კენობიმ და კლონებმა გაანადგურეს ადგილობრივი სოფლის მისადგომებთან ბუნკერში მყოფი დროიდები, მოგვიანებით კი შევიდნენ ქალაქში და დროებითი ბანაკი გაშალეს. კენობიმ კოდი, ვული, ვაქსერი და ბოილი დასაზვერად შეაგზავნა. კოდი და ვული დაბრუნდნენ და ამცნეს, რომ დროიდებმა ტვი'ლეკები მძევლებად აიყვანეს. უინდუსთან გასაუბრების შემდეგ ობი-ვანი და ჯარისკაცები შევიდნენ სოფელში, სადაც მიაგნეს დამშიებულ გატკარებს. მიუხედავად მათი მხრიდან თავდასხმისა, არსებები მახეში მოაქციეს და ჩამოაგდეს ხიდი, რათა ისინი ვერსად გადასულიყვნენ.[32]
ვაქსერმა და ბოილმა გვირაბიდან გამოიყვანეს ნორჩი ნუმა. კენობი მას ტვი'ლეკურად ესაუბრა და შეიტყო, რომ გოგონამ იცოდა, თუ სად იყვნენ პატიმრები. დაავალა რა კოდის დროიდებზე დივერსიის მოწყობა, თავად ობი-ვანმა, ვაქსერის და ბოილის დახმარებით, მწყობრიდან გამოიყვანა ქვეხები, თუმცა მათ ამ დროს დაარტყა TX-20-მა.[32]
TX-20-ის ტანკი მიზანში იღებს კენობის და ნუმას.
საბედნიეროდ, მეომრებს ტვი'ლეკები შეუერთდნენ, რა დროსაც კენობი ცდილობდა, ბავშვი დაეცვა, რათა მას ძალადობა არ ეხილა. „მომწონებლიდან“ ტრანსპორტის დაშვების შემდეგ უინდუმ კენობის გამარჯვება მიულოცა, თუმცა მათ უმალვე შემდეგი მისიის შესრულება წამოიწყეს. რესპუბლიკის ძალები ლესუსკენ გაემართნენ და ბოილმა კენობის ჰკითხა, თუ რას ნიშნავდა „ნერა“, რაზეც გენერალმა ჯედაიმ მიუგო — „ძმა“.[32] უინდუმ და მისმა ძალებმა ლესუმდე მიაღწიეს, ხოლო კენობიმ საკუთარი კონტინგენტი გადაიყვანა რაილოთის სამხრეთ ნახევარსფეროს გასათავისუფლებლად. მან წარმატებით აიღო ჯიქსუანის უდაბნო, ხოლო უინდუმ — ლესუ და, უოტ ტემბორის დაპატიმრების შემდეგ მოხდა პლანეტის სეპარატისტული მმართველობისგან საბოლოო გათავისუფლება.[56]
