პალპატინების ოჯახი

პალპატინების ოჯახი, იგივე პალპატინების მოდგმა ან პალპატინების სახლი, იყო არისტოკრატ ადამიანთა დინასტია, წარმოშობით შუა რგოლის ტერიტორიების პლანეტა ნაბუდან. მისი წევრი, შივ პალპატინი, გალაქტიკური პოლიტიკის მნიშვნელოვან ფიგურად იქცა. რესპუბლიკის ეპოქაში იგი, სანამ იავინის ბრძოლამდე 32 წელს უზენაეს კანცლერად აირჩევდნენ, ნაბუს ხალს როგორც სენატორი გალაქტიკურ სენატში წარმოადგენდა. რესპუბლიკისგან ფარულად შივი იყო დართ სიდიუსი, სითების ბნელი ლორდი. დართ ბეინის მემკვიდრე სიდიუსი სითი ლორდების მრავალთაობიანი ჩანაფიქრის ასრულებაზე ზრუნავდა. ეს ჩანაფიქრი გულისხმობდა ჯედაების ორდენის განადგურებას და სითების ძალაუფლების აღდგენას. მისი ზედამხედველობით მოხდა შეჭრა ნაბუზე, სეპარატისტული კრიზისი და კლონების ომები — კონფლიქტები, რომელთა მიზანი იყო სიდიუსის აღზევება. იავინის ბრძოლამდე 19 წელს მან სახელმწიფო ღალატის მომიზეზებით გაანადგურა ჯედაები და გახდა გალაქტიკური იმპერატორი, რესპუბლიკა გალაქტიკურ იმპერიად გარდაქმნა და ორმაგი ცხოვრება დაასრულა. პალპატინის გვარი იმპერიული ეპოქის დროს დაივიწყეს და გალაქტიკა მას უბრალოდ იმპერატორს უწოდებდა.

უკვდავების მიღების მიზნით სიდიუსი გაცოცხლდა იავინის ბრძოლიდან 4 წელს დაღუპვის შემდეგ. ძალის ბნელი მხარის დახმარებით მან საკუთარი რაობა გადაიტანა თავდაპირველი სხეულის კლონში, მიუხედავად იმისა, რომ ახალი სხეული არამდგრადი იყო. იმპერატორის გენეტიკური მასალის გამოყენებით მარადიულმა სითებმა შეიმუშავეს სხეულის სხვადასხვა ვარიანტი. სითების კულტის ექსპერიმენტების ერთ-ერთი შედეგი იყო დათანი, ჯაჭვიდან ხელოვნურად გაზრდილი. მართალია, იგი სიდიუსის კლონიც და გენეტიკური შვილიც იყო, მამასავით ძალისადმი მგრძნობიარე არ ყოფილა. თუმცა, იავინის ბრძოლიდან 15 წელს, მას, ცოლთან, მირამირთან, ეყოლა ძალისადმი მგრძნობიარე შვილი, რეი. სიდიუსს შვილიშვილი მიაჩნდა სულის შესასახლებლად საუკეთესო სხეულად, მაგრამ მისი გეგმები ჩაიშალა, როდესაც დათანმა და მირამირმა რეი გადასარჩენად ჯაკუზე უნკარ პლატს მიჰყიდეს. მოგვიანებით, იავინის ბრძოლიდან 21 წელს ისინი მოკლა სიდიუსის მსახურმა, ოჩიმ.

იავინის ბრძოლიდან 35 წელს, პირველი ორდენის და წინააღმდეგობის ომის დროს, სიდიუსმა გამოაცხადა დაბრუნების შესახებ. იმ დროისთვის მარადიული სითების ფლოტი, საბოლოო ორდენი, უკვე ჩამოყალიბებული იყო და მზად იყო, გალაქტიკის დასაპყრობად დაეტოვებინა ექსეგოლი. ექსეგოლის ბრძოლისას სიდიუსმა სცადა შვილიშვილის ბნელ მხარეს მოქცევა, უამბო რა, რომ სწორედ მას ჰქონდა პატივი, ემართა გალაქტიკა როგორც იმპერატორს და პალპატინების მოდგმის მემკვიდრეს. ჯედაის შეგირდმა სიდიუსის მემკვიდრეობაზე უარი თქვა და ის საბოლოოდ ბენ სოლოს და წარსულის ჯედაების სულების დახმარებით გაანადგურა, რითაც სიდიუსის გეგმა, ,არადიულად ემართა სითების იმპერია, ჩაიშალა.