სითების ბნელი ლორდი

ამ სტატიაში ან გვერდზე აღწერილია სითების წოდება "სითების ბნელი ლორდი". იხილეთ აგრეთვე მსგავსი წოდებები, მაგალითად დართი და სითი ლორდი.

„ყოველთვის ორია, არც მეტი, არც ნაკლები. მასწავლებელი და შეგირდი.“

―იოდა^{[წყარო]}

სითების ბნელი ლორდი იყო წოდება, რომელსაც ატარებდნენ ის სითი ლორდები, რომლებიც შედიოდნენ სითთა უძველეს ორდენში. ძველი რესპუბლიკის დროს მრავალი სითი, ბნელი ლორდების მეთაურობით, ებრძოდა ჯედაების ორდენს. გალაქტიკური იმპერიის წარმოქმნამდე ათასი წლით ადრე სითებმა ერთმანეთის თითქმის მთლიანად დახოცეს, შიდა დაპირისპირებებისა და ჯედაებთან შეტაკებების გამო. შემდგომში დართ ბეინი, ერთადერთი, ვინც გადაურჩა სითთა სრულ განადგურებას, გახდა ბნელი ლორდის წოდების მატარებელი და ჩამოაყალიბა ფილოსოფია, ცნობილი როგორც ორის წესი, რომლის მიხედვით ნებისმიერ დროს დაშვებული იყო მხოლოდ ორი ბნელი ლორდის არსებობა.^[2]

გალაქტიკური იმპერიის ჩამოყალიბების დროისთვის ბნელი ლორდები ბეინის მიერ დატოვებული პრინციპისადმი ერთგულები რჩებოდნენ. შივ პალპატინი, იგივე დართ სიდიუსი, გალაქტიკური იმპერიის მმართველი და სითების ბნელი ლორდი იყო. დართ ვეიდერი აგრეთვე გახდა წოდების მფლობელი, მას შემდეგ, რაც სიდიუსის სითი შეგირდის ადგილი დაიკავა.^[3]